چینی خلائی اسٹیشن خلا میں بے قابو

چین کا خلائی اسٹیشن اب بے قابو ہو چکا ہے اور بہت جلد زمین کی جانب گرے گا لیکن خیال ہے کہ اس کا بہت بڑا حصہ زمینی فضائی رگڑ سے جل کر زمین چھونے سے پہلے ہی ختم ہو جائے گا۔ 2011 میں چینی خلائی ماڈیول تیانگونگ اول زمینی مدار میں بھیجا گیا تھا جو ایک اہم مشن تھا۔ تاہم گزشتہ سال ستمبر میں چینی ماہرین لاکھ کوشش کے باوجود بھی اسے قابو نہیں کر پا رہے تھے۔ اب خدشہ ہے کہ ساڑھے آٹھ ٹن وزنی یہ خلائی اسٹیشن چند ماہ کے اندر اندر زمین کا رخ کرے گا۔

اندازہ ہے کہ اکتوبر 2017 سے اپریل 2018 کے درمیان کسی وقت میں یہ خلائی جہاز زمین پر گر جائے گا لیکن اس کے بہت تھوڑے ٹکڑے ہی زمین تک پہنچ پائیں گے۔ دوسری جانب کوئی نہیں جانتا کہ زمین پر یہ کس جگہ گرے گا۔ تاہم اس وقت یہ ہر چکر میں اپنا مدار چھوٹا کرتا جا رہا ہے اور اس ہفتے اس کی زمین سے قربت میں تیزی سے اضافہ ہوا ہے۔ اس موقع پر ہارورڈ یونیورسٹی کے ماہر ڈاکٹر جوناتھن مک ڈوویل نے کہا ہے کہ خلائی جہاز زمین سے 300 کلومیٹر دوری پر پہنچ چکا ہے۔ اس کے بعد سے فضا کثیف ہونا شروع ہو جائے گی اور پھر وہ تیزی سے زمین کی جانب بڑھنے لگے گا۔ جوناتھن نے کہا، ’’میرا خیال ہے کہ سال کے آخر سے 2018 کے ابتدائی ماہ تک وہ زمین پر گر جائے گا۔‘‘

چینی ماہرین نے اس خلائی جہاز پر کڑی نظر رکھی ہوئی ہے اور کسی بھی خطرے کی صورت میں وارننگ جاری کر دی جائے گی۔ تاہم بعض ماہرین کہہ رہے کہ اس کے بڑے ٹکڑے زمین پر آسکتے ہیں البتہ وہ سمندر میں بھی گر سکتے ہیں۔ جوناتھن کا خیال ہے کہ اگر زمین پر کوئی 100 کلوگرام ٹکڑا گر گیا تو اس سے تشویشناک خطرہ پیدا ہو سکتا ہے۔ دیگر ماہرین کا خیال ہے کہ اس خلائی جہاز کے زمین پر گرنے سے قبل ہمارے پاس خبردار ہونے اور تیاری کے چند گھنٹے ہی مل سکیں گے جو 6 سے 7 گھنٹے تک ہو سکتے ہیں۔ ستمبر 2011 میں تیانگوگ اول کو مدار میں روانہ کیا گیا تھا جس کا مطلب ’آسمانی محل‘ ہے۔ واضح رہے کہ چین خلا میں اپنے قدم جمانے کی بھرپور کوشش کر رہا ہے۔
 

Visit Dar-us-Salam Publications
For Authentic Islamic books, Quran, Hadith, audio/mp3 CDs, DVDs, software, educational toys, clothes, gifts & more... all at low prices and great service.